WISCONSIN, UNITED STATES-Patay ang usa ka tinun-an ug magtutudlo samtang unom ang samdan human gipusil sa 15-anyos nga babayeng suspek sulod sa usa ka pribadong Christian school sa estado sa Wisconsin, United States (US).
Nasuta sa mga otoridad nga tinun-an ang suspek sa naasoy nga tunghaan ug giila kini nga si Natalie Rupnow kinsang misulod pa sa klase sa wala pa gihimo ang mass shooting ug napalgang patay sa susamang crime scene.
Nagduda ang kapulisan nga siya mismo usab ang nagpusil sa iyang kaugalingon, apan aron segurado, ipaubos sa autopsy ang suspek aron masayran ang hinungdan sa iyang kamatayon.
Gipatawag na usab sa mga otoridad ang ginikanan sa suspek aron masayran kung kinsa ang tag-iya sa nasangpit nga pusil.
Samtang, anaa sa tambalanan ang unom nga naangol sa maong insidente diin duha niini anaa sa talandugon nga kahimtang.
