Gipasalig sa Malacañang sa publiko kagahapon nga andam na ang gobyerno alang sa pagsaulog sa Adlaw sa mga Santos ug Adlaw sa mga Kalag, lakip na ang pag-uli sa mga pasahero paingon sa mga probinsya.
Matud ni Presidential Communications Undersecretary Claire Castro, si Presidente Marcos nagmando sa mga ahensya nga bantayan ang selebrasyon sa Undas sa dili pa siya mobiya paingon sa South Korea alang sa Asia-Pacific Economic Cooperation (APEC) summit.
Miisa sa “code white alert” ang Department of Health (DOH) sa tanang ospital ug pasilidad sa panglawas sa tibuok nasud aron masiguro ang kaandam sa mga serbisyo medikal alang sa mga mobisita sa mga sementeryo ug sa mga motorista.
Nagbutang usab ang DOH og mga emergency tent sa mga expressway aron matabangan ang mga motorista nga nanginahanglan og medikal nga atensyon. Kapin sa 20 ka health emergency response team ipakatap sa dagkong sementeryo sa Metro Manila.
Gipahinumdoman sa ahensya ang mga mobisita nga magsul-ob og komportable nga sinina ug magdala og tubig, kalo o payong, ug hand sanitizer.
Samtang, ang Philippine Ports Authority nakatala og labing menos 952,258 ka pasahero sa lain-laing pantalan sa miaging lima ka adlaw, uban sa pag-uli sa mga pasahero alang sa Undas.
Nagpadala usab ang Philippine Coast Guard og 5,235 ka frontline personnel samtang gibutang ang tanan nga distrito, estasyon, ug sub-station sa heightened alert gikan Oktubre 30 hangtod Nobyembre 4.
Sigon ni Philippine National Police (PNP) chief Lt. Gen. Jose Melencio Nartatez Jr., nagpadala ang PNP og kapin sa 50,000 ka mga opisyal sa mga sementeryo, memorial park, transportation hubs, simbahan, ug uban pang lugar nga kanunayng adtoan sa publiko.
Nagsiguro usab ang mga pulis sa mga destinasyon sa turista tungod kay gilauman nga mobakasyon ang mga tawo atol sa taas nga weekend.
