Miabot sa 48 ka mga paresan ang pormal nga naminyo ang ilang paghinigugmaay atol sa usa ka Mass Wedding Ceremony sa Cebu Metropolitan Cathedral niadtong nakalabayng Lunes, Septiyembre 29, 2025.
Gi-organisar ang maong kalihukan sa Kagamhanang Dakabayan sa Sugbo pinaagi sa buhatan sa Cebu City Women’s and Family Affairs Commission (CCWFAC).
Ang mga magtiayong nakasal kay kadtong mga nag-ipon na sa kapin lima ka tuig ug walay igong ikagasto nga magpakasal sa simbahan.
Mismong si Cebu City Mayor Nestor Archival Sr. ang nagsilbing principal sponsor sa mga magtiayon sa maogn seremonya.
Mipadangay kini sa mga pamulong sa paggiya, pagkamapasalamaton, maayong pag-inisturyahan sa usag-usa, ug kahapsay sa ilang kaminyuon.
Gidasig niini ang mga paresan nga magpasalamat sa ilang mga minahal sa kinabuhi ug likayan ang mga lalis ma-gagmay man o dagko.
Giagak sa Kagamhanang Dakbayan ang gasto sa maong kalihokan gikan sa pre-wedding seminar, pari nga nangulo sa kasal, ug sa simbahan nga gihikay ang kalihokan lakip na sab ang mga pagkaon gidalit isip regalo sa ilang kaminyuon.
Human sa seremonyas sa Cebu Cathedral kay nagpahigayon pud kini og hamubo nga programa sa Plaza Sugbo para sa mga newly weds.
Gani gipahibalo sa CCWFAC nga aduna sila ikaduhang hugna sa Mass Wedding sa syudad sa umaabot Oktubre 29 diin aduna nay 52 ka mga manag-pares ang nagparehistro.
