Nagmando si Cebu City Mayor Nestor Archival alang sa mas estrikto nga seguridad sa tanang eskwelahan sa siyudad, lakip na ang dugang pagpatrolya sa mga pulis ug mas seryoso nga pagpaniid.
Kini nga lakang gihimo human sa nahitabong duguong pagpamusil sa usa ka pampublikong high school sa siyudad sa Tacloban diin tulo ka estudyante ang namatay ug ubay-ubay ang nangasamdang kaubanan.
Nakigtigom si Mayor Archival sa mga hepe sa kapulisan aron masiguro nga mabantayan pag-ayo ang palibot sa mga pampubliko ug pribadong tunghaan samtang nagpadayon ang mga klase.
Matod ni Archival, nihangyo siya sa kapulisan nga pakunhuran ang kahigayonan sa krimen pinaagi sa pagpakatap og mga dakoong deployment aron magpanuko ang mga tawo nga adunay dautang plano.
Gipasalig sa mayor, uban sa Cebu City Police Office (CCPO), nga hatagan gyud og prayoridad ang kaluwasan sa mga tinun-an taliwala sa kabalaka nga dala sa trahedya sa Tacloban.
Basi sa report sa kapulisan didto sa San Jose National High School, duha ka estudyante sa Grade 9 ang nagpapusil sulod sa classroom gamit ang Glock 9mm nga pistola ug usa ka .38 caliber nga rebolber.
Samtang bullying o pagpanghasi nga dugay nang giantos sa mga suspetsado ang gilantaw sa mga imbestigador nga posibleng rason sa maong pagpamusil.
Tungod niini, naalarma ang tibuok nasod ug nimando na si Presidente Ferdinand Marcos Jr. og lawom nga imbestigasyon, samtang ang Department of Education nagpadala na og mga eksperto aron mohatag og psychological nga tabang sa mga apektadong estudyante ug magtutudlo.
Samtang gawas sa dugang presensya sa mga pulis sa gawas sa eskwelahan, tutukan usab sa kagamhanan sa siyudad ang pagpaayo sa ilang emergency communication lines.
Gipasabot sa mayor nga importante kaayo ang dinalian nga pagtubag sa mga krisis, hinungdan nga gi-activate na usab ang five-minute response time sa mga otoridad aron daling makaresponde kung adunay dinalian nga panghitabo.
