CEBU CITY — Midepensa ang mayor sa Madridejos, Cebu sa panagtapok sa mga tawo niadtong Nobyembre 27 diin nisangput kini og bati nga reaksyon sa social media.
Kahinumdumang nibisita silang Presidential Spokesperson Harry Roque sa habagatang Sugbo aron mosalmot sa “mini suroy-suroy” nga gipasiugdahan sa Cebu Provincial Government.
Kuyog usab sa maong aktibidad mao ang mga opisyal sa Office of the Presidential Assistance for the Visayas (OPAV), si Governor Gwendolyn Garcia, ingon man ang mga kandidata sa Miss Universe Philippines 2020.
Matud ni Mayor Salvador Dela Fuente nga daan kining mihangyo sa mga konstitwente nga mosunod sa protocols sama lang sa physical distancing ug paggamit sa face mask.
Apan gumikan sa grabeng kadasig sa mga tawo, nagtapok ang mga tawo aron mohangop sa maong talagsaong mga bisita.
Dugang pa ni dela Fuente nga gisirad-an unta ang Kota Park diin nag-speech si Roque nianang higayona, apan ni-agi ang ubang mga tawo sa luyong bahin sa parke.
Gi-angkon sa mayor nga wala sila nakakontrol sa bagang duot sa mga tawo gumikan sa grabeng kalipay nga gibati sa mga konstitwente.
Hinungdan nga nitambag si Dela Fuente ngadto sa mga nakasaksi nga magtuob na lang, bisan pa man og walay sintomas sa COVID-19. (Bombo Gian Navarro)
