CEBU CITY – Gisalig sa Compañero Cayetano Tabang Volunteer gikan sa opisina ni Senator Pia Cayetano pinaagi sa Chief Political Officer-Visayas nga si Dr. Rey Martinez ang tabang pinansyal alang sa mga nagkinahanglan ug medical assistance sa Vicente Sotto Memorial Medical Center.
Personal nga gipahigayon ni Dr. Martinez ang pag-turnover sa mga voucher sa programang Bombohanay Bigtime ni Bombo Marchoflix Lucabon.
Giklaro niini nga libre ang nahisgutang mga voucher ug kinahanglan lang nga ipakita ang medical abstract sa pasyente.
Ang nahisgutang tabang pinansyal ang mukabat sa P2,000 hangtud na sa P50,000.
Gituohan niini nga walay bulok politika ang Bombo Radyo Cebu hinungdan nga ilahang nadesisyonan nga dinhi sa sibya-anan isalig ang nahisgutang mga voucher.
Gawas sa nahisgutang medical assistance, mihatag usab si Martinez ug mga Personal Protective Equipments (PPEs) ug alcohol alang sa mga empleyado sa sibyaanan.
Nagkanayon kini nga giila nila ang tabang sa media sa panahon sa krisis hinungdan nga ilahang gihatag ang maong mga PPEs isip pagpasalamat.
