BOHOL-Kasamtangang gisirad-an ang Virgin Island diving site sa Panglao, Bohol human nga gisuwat-suwatan ang mga coral o gasang sa ilawom sa dagat.
Usa sa mga gidagsa ang Virgin Island tungod sa iyang maanindot nga mga coral reefs apan, dako ang pagkakurat sa mga reef ranger ang namatikdan nga vandalism sa mga gasang niadtong buwan sa Hulyo ning tuiga.
Gani, sa ilang pagbalik niadtong Agosto 30, diin mas nabalaka ug naguol kini tungod kay mas nidaghan pa kini.
Basi sa imbistigasyon nga adunay labing menos 13 ka mga pangalan sama sa “Mojak”, “Min”, ug daghan pa ug nasuta nga ang maong mga pangalan kay iya sa mga guest ug snorkeling guide.
Unang mi-viral ang mga hulagway sa mga coral reefs ug daling milusad og imbistigasyon ang mga representante sa Department of Environment and Natural Resources (DENR), Bohol Provincial Environment Management Office, lokal nga kagamhanan sa Panglao, ug uban pang mga reef ranger niadtong Agosto 31, ug gipamatud-an nga tinuod ang taho nga gi-post sa social media.
Ang pagkadiskubre sa graffiti mao’y nakaaghat kang Bohol Gobernador Erico Aristotle Aumentado sa paghatag og P50,000 nga insentibo sa bisan kinsa nga makahatag og impormasyon mahitungod sa mga tawo nga miguba sa mga korales.
Gihatagan og gibug-aton ni Aumentado nga kinahanglang panalipdan ug luwason ang mga coral reef gikan sa pagkaguba hinungdan nga mohimo kini og legal action batok sa mga responsable.
