Wala maghisgot si Presidente Ferdinand “Bongbong” Marcos Jr. sa mga dagkong proyekto sa imprastraktura alang sa Sugbo sa iyang ika-upat nga State of the Nation Address (SONA).
Bisan tuod gilauman ni Cebu Vice Governor Glenn Anthony Soco nga hisgotan kini gumikan sa kamahinungdanon niini sa kalambuan sa Sugbo, partikular na ang 4th Cebu-Mactan Bridge ug ang Metro Cebu Expressway.
Atol sa pakighinabi sa Bombo Radyo Cebu Newsteam kang Cebu Vice Governor Soco, gituohan sa opisyal nga importante kini nga mga isyu aron mapadali ang paglihok sa mga palaliton ug serbisyo, ug pagpalambo sa kinatibuk-ang kalidad sa kinabuhi sa mga Sugbuanon.
Hinuon, iyang gidayeg ang malampusong SONA sa presidente nga naghatag og gibug-aton sa mga programa ug mga inisyatiba nga gitumong sa pagbayaw sa kinabuhi sa katawhang Pilipino.
Lakip na niini ang gihatag nga suporta sa Presidente alang sa pagpalambo sa micro, small ug medium enterprises, nga nahiuyon sa iyang mas lapad nga panglantaw alang sa economic expansion ug nahiuyon sa iyang adbokasiya sa Trabaho at Asenso, nga nagsumikad sa pagtuo nga ang saad sa nasudnong kalamboan anaa sa paghatag og mas maayong oportunidad alang sa mga trabaho, panginabuhian, ug entrepreneurship.
Makapadasig usab nga madungog ang taho sa Presidente nga siya nakatutok, lig-on, ug anaa sa saktong gisubay nga dalan aron makab-ot ang iyang panglantaw sa nasud.
