Padayon ang imbistigasyon sa mga gikatahong naapil sa nabanlas ug namatay nga mga trabahante sa usa ka manukan sa Compostela, Cebu atol sa pag-atake sa Bagyong Tino niadtong Nobyembre 4, 2025.
Pangunahan kini sa buhatan sa Department of Labor and Employment 7 diin una nila nga tan-awon ang occupational safety and health programs aron matumbok kung unsa ka preperado ang naasoy nga kompanya kon adunay katalagman nga miigo.
Matud sa mga residente sa Sitio Tamiao Dos, adunay mga trabahante nga naapil sa pagkaanod ug namatay dihang gibanlas sa baha ang gitrabahoan nga manokan.
Ingon man nga giingong usa ka pamilya ang natanggong sa manokan hinungdan nga susihonon kini sa mga tinugyanan sa DOLE-7 kung unsa nay nahitabo kanila.
Gitataw ni Atty. Roy Buenafe ang Regional Director sa DOLE-7 nga kinahanglan nga siguraduhon gayud ang kaluwasan sa mga
employers hilabi na sa panahon nga dunay kalamidad ubos sa mga lagda sa occupational safety and health.
Sa pagkakaron, wala pa matino kung pila kabuok ang namatay sa maong manukan.
Subay niini, gikanayon ni Buenafe nga ilang palabdan ang kahibalo sa mga kampanya kabahin sa preparedness panahon sa mga kalamidad.
Gidugang niini nga dili lang ang mga establishamento ang ilang tutukan inay lakip na ang kaluwasan sa mga trabahante.
Gihimug-atan usab sa opisyal nga dili mapugos ang mga empleyado nga motrabaho samtang anaa pa ang kalamidad o bag-o lang nakasinati hilabi na nga dako kini og epekto sa iyang kaugalingon.
