CEBU CITY-Padayong nag-antos ang kapin sa 10,000 ka mga mag-uuma sa dakbayan sa Sugbo sa epekto sa El Niño weather phenomenon sukad niadtong Pebrero 2024, nga nagkanayong wala pa sila makadawat og hinabang gikan sa City Government.
Kini matud pa sa Alliance of Cebu City Farmers Association, nga giimbitar sila sa mga executive session sa Cebu City Council aron ipadayag ang ilang mga kabalaka, apan hangtod karon wala pa silay nadawat nga hinabang.
Dugang pa, nga usa sa mga gikinahanglan karon sa mga mag-uuma mao ang maayong gidaghanon sa suplay sa tubig, nga nagsugyot nga mas maayu nga ang City Government makahatag kanila og mga water pump ug drills aron makapangita sila og tubig sa mga tubod.
Kana gumikan kay makaluluoy kaayo ang mga mag-uuma kung walay tubig nga magamit sa ilang mga pananom.
Giingung nangayo sila og mga materyales gikan sa Cebu City Agriculture Department (CAD) sama sa mga tangke sa tubig, hose, baril ug sprayer, apan ang maong mga materyales wala gihatag sa departamento karong tuiga.
Dugang pa, nga ang mga mag-uuma gusto nga mohangyo sa City Government nga hatagan sila og mga dekalidad nga seedlings, tungod kay ang ubos nga kalidad nga seedlings makaapektar sa kalidad sa mga utanon nga ilang anihon unya nga moresulta sa pagpaubos sa presyo.
Ang Alliance of Cebu City Farmers Association gilangkoban sa 72 ka asosasyon sa mga mag-uuma, diin ang matag asosasyon adunay labing menos 200 ngadto sa 300 ka miyembro.
