Gipasalig sa Philippine Coast Guard (PCG) ang pag-apod-apod sa tabang ngadto sa mga mangingisda nga padulong sa West Philippine Sea (WPS) nga grabeng naapektuhan sa sunod-sunod nga dagkong pagsaka sa presyo sa lana.
Sumala ni PCG Spokesperson Commodore Noemie Cayabyab, lain-laing mga suplay ang gidala ngadto sa mga mangingisda sa WPS, gamit ang pipila ka mga barko sa PCG.
Ang misyon gihimo samtang sila karon nangisda sa WPS diin gidala kanila ang food supplies, non-food items, ug pipila ka mga produkto sa petrolyo.
Lakip sa mga nahatagan na kaniadto og tabang mao ang mga mangingisda sa Capon Grande, Zambales, ug mga mangingisda nga padulong sa ubang mga bahin sa kadagatan sa gikuwestiyon nga katubigan.
Kini magpadayon sa umaabot nga mga adlaw, sumala ni Cayabyab, diin si PCG Commandant, CG Admiral Ronnie Gil Gavan, nagmando na sa tanang mga estasyon sa coast guard nga motabang sa pag-apod-apod sa tabang ubos sa Intensified Community Assistance Awareness Rescue and Enforcement (iCARE) Program.
Ubos niini, ang 16 ka regional district sa PCG sa tibuok nasod gitahasan sa pagtabang sa pag-apod-apod sa hinabang, subay sa programa sa iyang inahan nga ahensya, ang Department of Transportation (DOTr), ang ahensya nga nanguna sa programa sa fuel subsidy para sa sektor sa transportasyon.
