CEBU – Mokabat sa 300 ka job orders (JOs) ug mga kaswal nga empleyado sa Cebu City Hall kansang kontrata sa pagpanarbaho na-expire niadtong Septiyembre 30, 2022 dili na ma-rehire human sa sunodsunod nga evaluation ug apela sa mga trabahante.
Kini ang gipahibalo ni Mayor Michael Rama atol sa flag-raising ceremony sa Plaza Sugbo Lunes, Oktubre 24, 2022.
Dugang ni Rama nga awtomatik nga ma-renew ang mga empleyado nga nakaserbisyo og kapin sa 11 ka tuig sa City Hall ug kadtong mga lisensyado nga propesyonal.
Apan ang mayor niingon nga kining mga trabahante sa gobyerno kinahanglan nga walay record sa pagpangawat.
Kaniadtong Oktubre 4, 2022, si Rama niingon nga personal niyang susihon ang listahan sa mga empleyado aron masiguro nga walay mga “kawatan” nga mahatagan og renewal nga kontrata.
