CEBU CITY-Giselyuhan na sa Cebu City Mayor, Michael Lopez Rama ug Mandaue City Mayor Jonas Cortes ang Memorandum of Agreement o kon MOA, ang pag-rehabilitate sa Butuanon River ug Mahiga Creek arun maminusan na ang halapad nga pagbaha sa mga naasoy nga dapit.
Nasayran nga ang maong sapa ug creek maoy utlanan sa duha ka syudad.
Kahinumduman sa mga miaging semana diin ang kalit nga pag-uwan nibunok sa Metro Cebu hinungdan nga misugwak ang pipila ka mga sapa ug miresulta sa pagsaka sa tubig baha.
Saksi si Rama nga nahimong kanal ang mga sapa ug ingon man nga nahimong basurahan gumikan sa mga basura nga nagpundok sa kasapaan.
Samtang nipagawas og pahayag ang Cebu City Environment and Natural Resources nga pinaagi sa ilahang gipalig-on nga kasabutan arun mapalambo pa ang inter-agency coordination sa DPWH ug sa DENR arun sa pagsulbad sa mga problema sa maong dapit.
Sa laing bahin, nanghinaot ang Mayor sa Mandaue, Mayor Jonas Cortes nga pinaagi sa gisugyot nga kasabutan aduna nay kalambuan ug solusyon sa iyahang gisakupan nga lugar ug matud pa niya nga ang nahitabo nga pagsaka sa tubig baha tungod sa kakuwang sa ilahang pagpangandam.
