Giklaro sa Department of Justice nga wala pa makompirmar sa departamento kon tinuod ba nga bukog sa tawo ang mga bukog nga nakuha sa Taal Lake area.
Matod ni Justice Assistant Secretary ug Spokesperson Mico Clavano, posibleng dili bukog sa tawo ang sulod sa mga sako nga nakit-an ug na-recover sa Philippine National Police ug Philippine Coast Guard.
Kini nunot sa paglusad sa ‘search and retrieval operations’ sa maong departamento sa Taal Lake aron makit-an ang giingong mga patayng lawas sa mga missing sabungero.
Ang nasangpit nga tigpamaba nagkanayon nga ang Department of Justice naglikay sa pagpataas sa ilang ‘expectation’ tungod kay dili pa hingpit nga sigurado kung unsa ang sulod sa mga sako nga narekober.
Apan matud pa niya nga ang departamento nanghinaot nga ang Philippine Coast Guard naghimo sa tanan nilang mahimo alang sa operasyon nga nasugdan kalabot sa kaso sa mga missing sabungeros.
Kahinumduman nga gihimo ang diving sa dapit sa Taal Lake human gibutyag sa usa ka testigo nga dinhi giingong gilabay ang mga missing nga sabungero.
Partikular nga gibutyag ni alyas ‘Totoy’ o Julie ‘Dondon’ Patidongan, bag-ohay lang nga giingong gilubong ang mga biktima sa nahisgutang lugar o linaw.
Mao nga gipaambit ni Justice Spokesperson Mico Clavano nga ang mga narekober nga sako sa Taal lake giplanohan nga ipaubos sa pagtuki.
Diin matod niya nagpadala na ang departamento og mga personnel gikan sa National Bureau of Investigation ug mga prosecutors aron mahimong ‘witnesses’ sa search and retrieval operation.
Samtang wala pay kompirmasyon kon aduna bay bukog sa tawo ang mga narekober nga sako, gipaambit ni Clavano nga molanat pa og usa ngadto sa duha ka adlaw una kini matino sa ipahigayong forensic examination.
