CEBU CITY-Makadawat sa 1-milyones pesos isip ayuda ang matag usa sa 80 ka mga Sangguniang Kabataan (SK) gikan sa Kagamhaan sa Dakbayan sa Sugbo sunod semana.
Kini aron tagsatagsa kanila makapahigayon og summer league alang sa mga kabatan-onan sa dakbayan nga usa sa mga gipanglantaw nga kalingawan.
Kini ang gipahibawo ni Cebu City Acting Mayor Raymond Alvin Garcia niadtong Hulyo 13, 2024, atol sa pagbansay sa mga opisyales sa SK kabahin sa Media and Information Literacy Toolkit nga gipahigayon dido sa Barangay Duljo Fatima.
Pulong sa Acting Mayor nga karong Miyerkules, Hulyo 17, 2024, igo sab nga mahuman ang Palarong Pambansa, iyang ipang apod-apod ang tag-P1 ka milyon alang sa kada-SK sa dakbayan.
Ang maong ayuda alang sa SK gikan sa General Fund sa kagamhanan sa dakbayan.
Kabahin sa panagtapok diin nipasabot si Acting Mayor Garcia nga mahinungdanon kini kay aron mas may kaalam ang mga kabatan-onan sa SK sa karon nga panahon nga Internet na ug social media maoy nag-unang tinubdan sa impormasyon.
