CEBU – Nanawagan ang Cebu Provincial Disaster Risk Reduction and Management Office (PDRRMO) sa mga Sugbuanon niadtong Miyerkules, Hunyo 22, nga mag-alerto ug magpabilin sa ilang tagsa-tagsa ka panimalay tungod sa dautang panahon.
Kini human adunay nadawat nga taho si Wilson Ramos, interim officer sa PDRRMO, nga adunay mga pagbaha sa pipila ka mga dapit sa probinsiya tungod sa kusog nga ulan.
Gipahinumdoman usab ni Ramos ang mga mananagat sa dapit nga magmabinantayon tungod sa dautang panahon.
Una nang gitaho sa Philippine Atmospheric, Geophysical and Astronomical Services Administration (Pagasa) sa Mactan niadtong Miyerkules nga nasinati sa Sugbo ang kusog nga pag-ulan niadtong Miyerkules tungod sa Inter-Tropical Convergence Zone (ITCZ), nga nakaapekto sa kadaghanang bahin sa nasud.
Gi-report usab sa Pagasa ang usa ka low pressure area nga nakita sa 170 kilometro silangan sa Borongan City sa Eastern Samar.
