CEBU –Hangyo karun sa Pinagkaisang Samahan ng mga Tsuper at Operators Nationwide (PISTON)-Cebu Chapter sa LTFRB 7 ug sa mga LGU nga pabalikon na sa pagbyahe ang ubang mga traditional jeepney ilabi na nga naghinangat na ang pagbalik sa klase.
Gibutyag ni Greg Perez, ang presidente sa PISTON-Cebu Chapter, nga nagkuwang na ang mga sakyanan karun ug mas magkuwang kini kung mubalik na ug kadaghan ang mga pasahero gumikan kay mudagsa na usab ang mga estudyante.
Matud pa, anaa man sa gihapon ang mga driver apan sa pagkakarun kay nanarbaho una kini ug lain gumikan kay wala na makabyahe ang ubang mga traditional jeepney human nga nagdagan na ang mga modern PUJs.
Samtang, gitino ni Perez nga ang mga driver andam usab nga mupaubos pagbalik sa pletehan kung adunay pagkunhod sa presyo sa lana.
Nanghinaut ang transport sector nga mubalik sa P34 nga presyo sa matag litro sa lana, diin dili lang sila ang maka-benepisyo niini inay ang tanan gumikan kay ang pagkunhod sa presyo sa lana, nagpasabot usab sa pagkunhod sa presyo mga palaliton.
Kahinumdoman nga sunod-sunod na ang roll back sa presyo sa lana, butang nga gikalipay sa pipila ka mga driver.
