DAANBANTAYAN, CEBU-Ipatuman na sa isla sa Malapascua sa lungsod sa Daanbantayan sa amihanang Sugbo ang Micro Grid System Program aron sa hingpit nga pagsulbad sa isyu sa isla kabahin sa unstable nga suplay sa kuryente sa nakalabay nga power distribution company nga nagdalit og serbisyo sa maong lugar.
Gipapaspasan kini ni Cebu Provincial Governor Gwendolyn Garcia diin ang kagamhanang lalawigan kay migasto na sa kapin P50-milyones sukad niadtong Agosto 2024 human gihulipan ang Cebu II Electric Cooperative, Inc. (CEBECO II).
Giawhag gani niini ang CEBECO II sa pagkumpleto nga gilatid sa Department of Energy (DOE) aron makasugod na kini sa pagpaningil sa mga konsumidor og kuryente sa isla nga sa pagkakaron nakatagamtam pa og libreng stable nga kuryente.
Lakip sa gitakdang mga rekisitos mao ang Micro-Grid System Program (MGSP), nga maghatag ug katungod sa power provider sa kagamhanang lalawigan sa pagpaningil og rates sa mga konsumidor matod pa ni Antonio Mariano Almeda, ang administrator sa National Electrification Administration (NEA).
Kini nga pamahayag kay nakuha kang Almeda sa pakigpulong niini sa Gobernadora ngadto sa Kapitolyo kagahapong adlawa sa Biyernes Enero 31.
Kauban niya si DOE Assistant Secretary Mario Marasigan ug CEBECO II General Manager Lowell Belciña.
Sa higayon nga mahatag na sa DOE ang MGSP, ang Probinsya moatras gikan sa pag-abaga sa mga panginahanglanon sa kuryente sa isla, nga magtapos sa interim arrangement nga gihimo sa panahon sa krisis.
