CEBU CITY-Mokabat sa 249 ka mga street dwellers ang naluwas sa kapolisan sukad nimando si Cebu City Mayor Michael Rama sa paghawan sa kadalanan sa siyudad sa mga walay panimalay.
Matud pa ni Police Colonel Ireneo Dalogdog, hepe sa Cebu City Police Office (CCPO), nga ang mga na-rescue nga mga tawo gi-turnover sa Department of Social Welfare and Services (DSWS) ug gipapuyo sa temporaryong housing facility sa South Road Properties.
Kadtong adunay pamilya o paryente sa ubang lungsod sa lalawigan sa Sugbo gihatagan og kuwarta aron makapauli.
Gibantayan sila aron masiguro nga makauli sila sa ilang tagsa-tagsa ka pamilya ug dili na mobalik sa dakbayan sa Sugbo.
Dugang pa, nga magpadayon sila sa ilang operasyon sa pagluwas sa mga tawo nga walay kapuy-an bisan pa man nga gilibkas na ni Rama ang iyang ultimatum sa tanang opisyal sa barangay ug dakbayan sa paghawan sa kadalanan sa mga nagpuyo sa kadalanan.
Sa sayo pa si Rama nimando nga gusto niyang makita ang siyudad nga gawasnon na sa mga homeless sa Hunyo 12, apan ang mga street dwellers nagpadayon sa pag-okupar sa pipila ka bahin sa mga sidewalk ilabi na sa gabii.
