Gipagawas sa Philippine Institute of Volcanology and Seismology (PHIVOLCS) ang report kalabot sa tulo ka hinay nga linog nga nitay-og sa amihanang Sugbo sugod niadtong Lunes sa gabii hangtod kaganihang sayo sa buntag, Martes.
Basi sa datus sa PHIVOLCS, sa lungsod sa Santa Fe sa Isla sa Bantayan, ang magnitude 3.7 nga tectonic earthquake nitay-og sa alas 11:12 sa gabii niadtong Marso 16, 2026, diin ang sentro o epicenter niini nahimutang 10 kilometros sa habagatan, 31 degrees kasadpan sa Santa Fe, ug adunay giladmon nga 4 kilometros.
Base sa earthquake bulletin, tectonic ang gigikanan sa maong linog tungod sa paglihok sa mga fault ilawom sa yuta, ug matod sa mga otoridad, wala’y gipaabot nga kadaot ug wala usab gilauman nga adunay mga aftershocks, ug sa bulletin nga gipagawas sa alas 11:26 sa gabii, wala’y natala nga intensities sa mga silingang komunidad.
Pipila ka oras ang nilabay, duha pa ka pagtay-og ang narekord kaganihang sayo sa buntag sa Martes sa kadagatan sa amihanang Sugbo, diin ang duha giila nga aftershocks sa magnitude 6.9 nga linog niadtong Septiyembre 30, 2025.
Gitala sa PHIVOLCS nga ang unang pagtay-og nahitabo sa alas 5:29 sa buntag karong Marso 17, nga adunay magnitude nga 3.4, ang epicenter niini nahimutang 15 kilometros sa habagatan, 32 degrees kasadpan sa Dakbayan sa Bogo, nga adunay giladmon nga 4 kilometros.
Gisundan kini sa laing paglihok sa alas 5:41 sa buntag nga adunay kusgon nga magnitude 2.6, diin ang linog natultolan 12 kilometros sa kasadpan sa lungsod sa Tabogon ug adunay giladmon nga 5 kilometros. Sama sa naunang pagtay-og, kini giisip gihapon nga tectonic ang gigikanan.
Giklaro sa PHIVOLCS nga wala’y gipaabot nga kadaot gikan sa maong duha ka aftershocks ug wala na usab gilauman nga dako pa nga mga pagsunod niini.
Matod sa mga seismologist, kining mga bag-ong paglihok kabahin gihapon sa nagpadayon nga seismic activity nga konektado sa kusog nga linog sa amihanang Sugbo niadtong miaging tuig.
