Gikalipay sa pamunoan sa National Security Council ang ilang nakuha nga suporta gikan sa publiko kalabot sa mga lakang nga gihimo sa gobyerno aron depensahan ang katungod sa nasod sa gikalalis nga kadagatan sa West Philippine Sea.
Matud ni National Security Adviser, Secretary Eduardo Año, nga pamatuod lang kini nga ang mga Pilipino nagkahiusa sa samang tumong nga depensahan ang soberanya sa Pilipinas sa nasangpit nga rehiyon.
Kini nga pamahayag gihimo ni Año isip tubag sa survey sa OCTA Research diin moabot sa 84% sa mga Pilipino ang mipadayag og suporta sa mga paningkamot sa gobyerno sa West Philippine Sea.
Gitataw sa opisyal nga kining lakang sa gobyerno gibasi lamang sa kasamtangang Philippine Maritime Zones Law ug Philippine Archipelagic Sea Lanes Law.
Gawas niini, basi usab kini sa United Nations Convention on the Law of the Sea kon UNCLOS ug sa kadaugan sa nasod sa 2016 Arbitration batok sa China.
