CEBU – Wala nabalaka si Negros Oriental Gov. Pryde Henry Teves nga walay gigahin nga salapi ang national government alang sa Bacong International Airport project sa 2023 national budget.
Matud pa ni Governor Teves nga sa pagkakaron dili angay kabalak-an gumikan aduna pay nahibilin nga P500M nga budget ang gobyerno ug padayon nga moving ang maong proyekto.
Dugang sa gobernador nga kung makompleto na ang tanan, labi na ang mga dagkong kadalanan ug makadawat na og ”Go-Signal” ang Korean government gikan sa Pinas mamahimo na nilang sugdan diha-diha dayon ang pagtukod sa airport.
Gitino usab niini nga wala nay kahigayonan nga mabalhin pa ang maong proyekto sa laing probinsiya sanglit aprobado na kini sa mga hingtungdang ahensya nga sa Bacong ibutang ang international airport.
Gipasabot sa gobernador nga mokabat ngadto sa P6-bilyones ang kantidad sa maong proyekto nga mapuslan unya sa mga Negrosanon.
