Nipadangat og suporta ang National Maritime Council (NMC) alang sa Department of National Defense (DND), human sa bag-ong pagsaway gikan sa Chinese Ministry of National Defense bahin sa mga isyu sa West Philippine Sea (WPS).
Ang DND sa sinugdanan nagpagawas og baruganan sa Pag-asa Island ug Lawak Island sa West Philippine Sea, nga parehong kabahin sa teritoryo sa Pilipinas.
Bisan pa, gisaway kini sa Chinese MND, nga nag-ingon nga ang mga kalihokan sa imprastraktura ug kalamboan sa Pilipinas sa mga isla sa Pag-asa ug Lawak usa ka klaro nga paglapas sa soberanya sa China.
Sumala sa NMC, ang bisan unsang kalamboan sa mga isla sa Kalayaan Island Group usa ka lehitimong bahin sa pagdumala sa Pilipinas aron mapaayo ang mga kondisyon, seguridad, ug panginabuhi sa mga Pilipino nga nagpuyo didto.
Ang gobyerno sa Pilipinas adunay usab katungod, sumala sa NMC, sa pagmonitor sa mga Pilipino nga nagpuyo sa nahisgutang lugar, ug ang bisan unsang kalamboan nga himuon dinhi kabahin sa soberanya sa nasud.
Gisubli sa konseho nga ang gitawag nga “nine-dash line” nga pag-angkon sa China walay legal nga basehan ubos sa internasyonal nga balaod, base usab sa 2016 Arbitral Award nga mipabor sa Pilipinas ubos sa UNCLOS.
Gipasalig usab sa konseho nga ang Pilipinas magpabilin nga lig-on sa pagpasiugda sa usa ka internasyonal nga kahusay nga gibase sa mga lagda, bisan pa sa mga hulga gikan sa mga pwersa sa China nga kanunay magsugod sa pagpanghasi sa gikuwestiyon nga katubigan.
