Gibarugan sa Department of National Defense (DND) ang padayon niining pagdepensa sa mga katungod ug integridad sa teritoryo sa Pilipinas sa West Philippine Sea (WPS), dungan sa pagsaulog sa nasod sa ika-10 nga anibersaryo sa makasaysayanong 2016 Arbitral Award karong adlawa, Hulyo 12, 2026.
Gipahayag ni Defense Secretary Gilberto “Gibo” Teodoro Jr. nga nagpabiling mahinungdanon ang maong desisyon tungod kay lig-on niining giila ang katungod sa nasod sa iyang Exclusive Economic Zone (EEZ).
Gipasiugda usab niya nga sa pagkakaron, nagkadaghan ug nagkahiusa ang mga Pilipino sa pagpakita og kahibalo ug suporta sa pagpanalipod sa maong kadagatan.
Matud ni Teodoro, ang DND ug ang Armed Forces of the Philippines (AFP) magpadayon sa pagpalig-on sa mga kapabilidad sa depensa sa nasud samtang gipanalipdan ang mga kadaugan sa seguridad.
Dugang pa sa kalihim, magpabilin nga komitado ang Pilipinas sa pagtuman sa internasyonal nga balaod, ilabi na sa 1982 United Nations Convention on the Law of the Sea (UNCLOS), ug dili gyod motugot nga ang mga katungod sa nasud sa West Philippine Sea madaot o makuha sa uban.
