Giduso karon sa Senado ang usa ka balaodnon nga nagtinguha sa pagdumili sa pag-sweldo sa mga taas nga opisyal sa gobyerno nga absent ug walay klarong pagpasabot.
Ang balaodnon naglangkob sa Presidente, Bise Presidente, mga senador, mga kongresista, mga napili nga opisyal, mga kalihim sa gabinete, ug mga pangu sa departamento.
Gilatid usab niini nga ang mga allowance dili ihatag sa mga opisyal nga wala mitungha ug walay hustong pahibalo sa pag-absent.
Sumala ni Senador Erwin Tulfo, ang nagpasiugda sa balaodnon kay giingong naanad ang mga taas nga opisyal nga walay mobadlong kanila ug giswelduhan gihapon bisan nga ni-absent kini. Dugang ni Tulfo nga dako kining makauulaw sa mga ordinaryong trabahante sa gobyerno nga dili mabayran kung maka-absent.
Gipasiugda sa Senador nga ang polisiya nga “no work, no pay” kinahanglan nga patas. Ordinaryo man nga mga trabahante o taas nga opisyal.
Human niini, gidayeg ni Tulfo ang boluntaryong pagsuspenso ni Sen. Jinggoy Estrada sa iyang sweldo sa dihang siya gidakop.
Samtang, mahinumduman nga ang isyu sa “no work, no pay” nahimong sentro sa isyu tungod sa pagkawala ni Sen. Ronald “Bato” dela Rosa apan padayon gihapon siyang nakadawat sa iyang sweldo.
