Nakig-alayon ang Kagamhanang Lalawigan sa Sugbo sa Office of the Civil Defense – Central Visayas (OCD-7) alang sa pagpalambo niini sa disaster preparedness para sa tibuok probinsya.
Kini ang nahisgutan atol sa bag-ohay lang nga panagtagbo nila ni Cebu Provincial Governor Pamela “Pam” Baricuatro ug ni OCD-7 Regional Director Joel Erestain sa Kapitolyo kauban si Cebu Provincial Disaster Risk Reduction and Management Officer Colonel Dennis Francis Pastor.
Ang sentro sa ilang diskusyon kay mao ang sugyot nga pagtukod og command center sa Kapitolyo, ang gilaraw nga mahimong main hub para sa real-time situational awreness, paspas nga decision-making, episyente nga resource deployment panahon sa emerhensya, ug suporta sa nagpadayon mga public service operations.
Ang OCD kay mao ang implementing arm sa National Disaster Risk Reduction and Management Council (NDRRMC) nga gitahasan sa pagdumala sa civil defense ug disaster risk reduction programs sa nasud.
Kahinumduman nga niadtong nakalabayng buwan sa Agosto, gibutyag ni PDRRMO Head Pastor nga dili pa andam ang Kapitolyo sa bisan unsang katalagman nga posibleng muigo tungod sa pagputol sa pundo ug tahas niini sa nakalabayng administrasyon.
