CEBU CITY-Giduso sa Sangguniang Panlungsod sa kagamhanang dakbayan sa Sugbo ang usa ka Ordinansa sa pagpanalipod sa tanang service crew nga nagtrabaho sa dakbayan kontra sa mga pang-abuso ug ingon man sa bisag unsang matang sa pagpangdaot.
Sa esklusibong pakighinabi sa Bombo Newsteam kang Cebu City Councilor Jose Lorenzo Abellanosa, kinsa maoy niduso sa ordinansa atol sa sesyon niini niadtong Septiyembre 4.
Gipa-ambit niini, nga tumong sa maong ordinansa ang sugyot sa kadaghanan ilabi na sa nahitabong isyu nga pipila ka mga customer ang nangbastos ug mga service crew tungod kay wala sila kauyon sa mga pipila ka butang.
Ang sugyot nga ordinansa gipasar na ngadto sa Committee on Laws ug sa Committee on Labor and Employment, Cooperative, and Livelihood alang sa dugang nga pagsusi.
Human niini, ipaubos kini sa public hearings ang maong proposed ordinance, kon gikinahanglan, una kini mopadayon sa ikaduhang pagbasa, ikatulo nga pagbasa, ug ingon man sa final approval.
Kon sa higayon maaprobahan, ang gisugyot nga lakang maglakip sa mga service crew sa mga patigayon nga nahimutang sulod sa hurisdiksyon sa dakbayan sa Sugbo.
Kahinumduman nga nahimong dakong hisgutanan sa nangaging buwan ang isyu ni Jude Bacalso sa pagpabarug sa kapin duha ka oras sa usa ka waiter sa usa ka kan-awa sa tanyag nga mall sa dakbayan sa Sugbo tungod kay gitawag siya og “sir” imbes sa iyang “preferred pronoun”.
