MANDAUE CITY-Gipasanginlan ni outgoing Mandaue City Treasurer Atty. Regal Oliva si Mandaue Lone District Congresswoman Emmarie “Lolypop” Ouano-Dizon nga maoy hinungdan sa panghitabo kabahin sa pagpabalhin sa iyang posisyon isip City Treasurer sa Dakbayan sa Mandaue ngadto sa laing local government unit sa kaulohan.
Sa usa ka pamahayag ni Oliva sa mga miyembro sa media, ginganlan niini ang kongresista nga “bakakong daku”, human nga gilimod ang maong panghitabo.
Matod ni Oliva nga ang iyahang kasaligang tinubdan gikan sa Department of Interior and Local Government (DILG) ug Office of the House Speaker Martin Romuadez mikompirmar nga si Ouano-Dizon ug mga sakop sa iyang pamilya ang mihangyo nga ilisan siya.
Dugang pa ni Oliva nga higala man unta sila sa kongresista apan nabiktima kini sa “collateral damage” sa politika sa dakbayan.
Una nang gihimakak ni Ouano-Dizon ang espekulasyon nga siya ang naa sa likod sa pagpabalhin ni Oliva gikan sa dakbayan sa Mandaue ngadto sa Dakbayan sa Navotas sa Metro Manila.
