PROVINCE OF CEBU- Aprobado na sa unang pagbasa ang sugyot nga P25-bilyones nga 2025 budget sa Cebu Provincial Capitol atol sa pagtuki niini sa Sagguniang Panlalawigan kagahapong adlawa, Lunes Oktubre 21, 2024.
Ang maong budget proposal kay gipangulohan ni Cebu Provincial Governor Gwendolyn Garcia diin adunay pagsaka sa 8.7% ang proposed 2025 budget kun itandi sa budget karong tuiga 2024 nga anaa lang sa P23-bilyones.
Nagtimaan kini sa pinakadako nga budget proposal sa kasaysayan sa kagamhanang probinsya sa Sugbo.
Sa eksklusibong pakighinabi sa Bombo Newsteam kang Cebu 6th District Board Member Glenn Anthony Soco, ang Chairman sa Committee on Budget and Appropriations diin matod niya nga ang tinubdan sa pundo alang sa budget naglakip sa P6-bilyones gikan sa National Tax Allocation, ug uban pang locally sourced income gikan sa local taxation, sama sa real property ug quarry taxes.
Ang kagamhanang probinsya mogamit usab sa lain-laing tinubdan sa kita gikan sa nagkalain-laing mapuslanon nga pamuhunan ug negosyo sa ekonomiya uban sa pakigsosyo niini sa pribadong sektor.
Dakong tipik sa proposed budget, nga P14 bilyones, ang gigahin isip AIP alang sa development ug infrastructure projects, nga una nang giaprobahan sa Provincial Development Council atol sa panagtagbo niini niadtong Oktubre 15.
Naglakip ang maong budget sama sa P3.8-bilyones nga alokasyon alang sa serbisyong panglawas ug medikal sa mga tambalanan nga gidumala sa Kapitolyo; laing P3.5 bilyones alang sa padayon nga pagpalambo sa imprastraktura sama dalan ug tulay ug mga proyekto nga solar lamps sa kadalanan; samtang laing P3.3 bilyones ang gigahin alang sa bulk water system program sa probinsiya sa kapin 25 ka mga lungsod ug komponent nga dakbayan niini.
