METRO MANILA-Anaa sa P360.48 milyones ang kantidad sa kadaot sa sektor sa agrikultura tungod sa bag-ong bagyong Enteng ug Habagat, kini base sa labing ulahing taho sa DA- Disaster Risk Reduction Management Operations Center.
Matod ni Agriculture ASec. Arnel De Mesa, ang probinsya nga nakatala sa labing dakong kadaot mao ang Camarines Sur nga mokabat sa P342 milyones.
Gikataho usab ang kadaot sa agrikultura sa Catanduanes, Albay, Negros Occidental, Northern Samar, ug Bulacan.
Samtang nagpaabot sa mga report nga isumiter sa mga rehiyonal nga buhatan sa DA sa CAR, Ilocos region, Cagayan valley, Calabarzon ug Mimaropa.
Sa laing bahin ang mga produkto sa agrikultura nga nadaot, sama sa produksiyon sa bugas ang nakahiagum ug labing taas nga volume nga mikabat sa 14,177 metriko tonelada nga nagkantidad og P340.06 milyon.
Nakatala usab ug P14.01 milyones ang pagkawala sa produksiyon sa mais, P4.33 milyones ang kadaot sa mga high value crops ug P1.77 milyones ang pagkawala sa produksiyon sa kamoteng kahoy.
