LAPU LAPU CITY-Nasakmit sa kapulisan sa Dakbayan sa Lapu-Lapu ang kapin sa P7.4 milyones nga nagkantidad sa ilegal nga drogas human sa komprehensibo nga intelligence-driven nga operasyon nga gilusad niadtong Black Saturday.
Kini ang hiniusang operasyon sa kapulisan sa City Intelligence Unit ug City Drug Enforcement Unit, Lapu-lapu City Police Office (LCPO), MPU ug NISG, NAVFORCEN nga miresulta sa pagkasakmit sa P7.4 milyones nga kantidad sa shabu ug pagkasikop sa usa ka high-profile drug suspect sa Sitio Lawis, Brgy. Pusok, dakbayan sa Lapu-lapu alas niadtong Marso 30, 2024.
Nakuha gikan sa suspek ang kapin sa usa ka kilo sa shabu ug usa ka cellphone ug usa ka backpack.
Subay niini, gidayeg ni PBGen Anthony Aberin, Regional Director, PRO7 sa makuti nga paniktik ug imbestigasyon nga mga buhat sa mga operating units.
Ang suspek pasakaan og kasong kalapasan sa R.A. 9165 o ang Comprehensive Dangerous Drugs Act of 2002.
