Nadawat na ang hinabang nga tag P1 million sa pito ka local government unit (LGU) sa Northern Cebu nga apektado sa 6.9 magnitude nga linog, personal kini nga gihatod ni Mandaue City Mayor Thadeo “Jonkie” Ouano, inubanan ni Vice Mayor Glen Bercede ug mga konsehales sa dakbayan sa Mandaue.
Gitunol ang mga tseke sa pito ka LGU sa Northern Cebu nga makadawat niini nga gilangkoban sa Bogo City, Sogod, Borbon, Tabogon, Medellin, San Remigio ug Daanbantayan.
Taliwala sa nahitabong katalagman nga mitumaw sa probinsiya sa Sugbo nga lakip usab nga naapektuhan ang dakbayan sa Mandaue, giseguro gihapon sa siyudad nga makahatag og tabang sa mga lugar nga na-grabehan sa linog.
Maabi-abihon usab nga gidawat sa mga mayor sa pito ka Local Government Unit ang mga tseke ug mipadangat sa ilang mainiton nga pasalamat ngadto ni Mayor Jonkie ug kaubanan labi na sa mga Mandauehanon nga mitabang usab sa pag-ampo.
Gawas sa tag P1 million nga financial assistance, mipadala usab ang kagamhanan sa siyudad sa Mandaue og 40-member Psychosocial Response Team nga magpahigayon og psychological first aid o stress debriefing ngadto sa mga apektado sa linog sa Northern Cebu.
Kahinumdoman nga niadtong Oktubre 1 mipadala usab si Mayor Jonkie og firetruck, water filtration system, logistic van, ambulance ug search, rescue and retrieval team nga mitabang sa mga biktima sa linog.
