Natumong lang matod pa ang pag-atubang ni kanhi Presidente Rodrigo Duterte sa International Criminal Court (ICC) sa nagpadayon nga impeachment trial sa Senado batok sa iyang anak nga si Bise Presidente Sara Duterte.
Matod pa ni Prosecution spokesperson and Lanao del Sur Representative Zia Alonto Adiong, walay plano nga ilihis ang atensyon sa publiko gikan sa kaso sa Bise Presidente.
Gipasabot ni Adiong nga ang maong timing usa lamang ka coincidence, tungod kay ang ICC naglihok subay sa kaugalingon niining iskedyul ug walay makadiktar kanila kung kanus-a sila magpahigayon og mga hearing.
Gipanghimakak usab ni Adiong ang mga hungihong nga natabonan sa pag-atubang sa ICC ang impeachment trial ni VP Sara, ug namatikdan nga daghang mga Pilipino ang padayon nga nagsunod sa mga panghitabo sa Senado.
Gihatagan og gibug-aton ni Adiong nga managlahi ang duha ka kaso ug nagpadayon kini nga independente subay sa tagsa-tagsa nila ka legal nga proseso.
Kahinomdoman nga niadtong Mikyerkules, personal nga mitungha si kanhi Presidente Duterte sa ICC samtang nangandam ang korte alang sa mga proseso kalabot sa mga kaso sa “crimes against humanity,” nga naggikan sa mga alegasyon sa pagpatay atol sa iyang kampanya batok sa ilegal nga droga.
