Giselyohan ug walay nakit-an sa dihang gisilbi sa pulis ang warrant of arrest ang condominium unit sa kanhi Congressman Zaldy Co sa Bonifacio Global City (BGC) sa Taguig batok sa kanhi magbabalaod niadtong Sabado, Nobyembre 22.
Ang mga personahe sa Southern Police District ug Taguig Police Station miadto sa condo sa kanhi magbabalaod aron isilbi ang warrant apan sumala sa mga caretaker, ang unit giselyohan na sulod sa halos usa ka bulan.
Walay mga paryente o bisan kinsa nga mitungha sa dihang nanuktok ang mga awtoridad sa pultahan sa condo unit.
Kahinumduman nga ang warrant of arrest gi-isyu kaniadto alang sa kanhi magbabalaod ug uban pa, kinsa giingong nakadawat og daghang kantidad sa kickback gikan sa mga proyekto sa flood control.
Apan sa iyang bahin, gihimakak ni Co ang mga pasangil nga kurakot batok kaniya.
Mitaho si Interior and Local Government Secretary Jonvic Remulla sa sayo pa nga moadto sila sa mga address sa balay ni Co aron isilbi ang warrant of arrest ug kung ang kanhi magbabalaod naa pa sa gawas sa nasud, ilang hangyoon ang International Criminal Police Organization (Interpol) nga mag-isyu og notisya alang sa pag-aresto ni Co ingon man hangyoon ang Department of Foreign Affairs (DFA) nga kanselahon ang iyang pasaporte.
