Nasagmuyo si Ukrainian President Volodymyr Zelenskyy sa balik-balik nga pagbisita sa mga envoy sa Estados Unidos sa Moscow nga wala moagi sa Kyiv, nga iyang gihulagway nga “disrespect” o kakulang sa pagtahod taliwala sa nagpadayon nga gubat sa Ukraine.
Sa usa ka interbyu, miingon si Zelenskyy nga bisan pa sa iyang pagsabot sa mga hagit sa logistik, dili ikalimod nga ang pagbisita ni Steve Witkoff ug Jared Kushner sa Russia nga wala mohapit sa Ukraine nagpakita og kakulang sa pagtahod.
Si Witkoff, nga special envoy ni U.S. President Donald Trump, nakigkita na kang Russian President Vladimir Putin sa Moscow sa makadaghang higayon.
Nahibal-an nga ang maong mga opisyal wala pa makabisita sa Kyiv.
Bisan pa niini, gipasiugda ni Zelenskyy ang kamahinungdanon sa padayon nga kooperasyon sa Estados Unidos.
Sa laing bahin, ang mga panagsultihanay bahin sa ceasefire sa Ukraine nga milungtad na og sobra sa upat ka tuig nagpadayon.
Sa pagkakaron, ang mga negosasyon nagpabilin nga wala’y kasiguroan, samtang ang Ukraine nagpadayon sa panawagan alang sa mas aktibong partisipasyon ug mas klarong pag-ila sa posisyon niini sa proseso sa kalinaw.
