CEBU – Gitino sa kapitan sa Barangay Tipolo, dakbayan sa Mandaue, nga si Ramon Alimpangog, nga sa ilahang panagtigom kauban ang DPWH ug contractor, gisugyot ang paghatag ug tampo sa matag establisimento nga mukabat sa P5,000 arun nga mas mapadali ang trabaho sa P. Basubas St.
Matud ni Alimpangog nga gikinahanglan ang pagpalit ug adhesive alang sa ‘curing’ sa dalan arun nga kini maagi-an na sa mga tawo ug sakyanan.
Sigon pa, wala malakip sa P14-million nga pondo sa maong proyekto ang naasoy nga adhesive hinungdan nga ilaha lang kining nasabotan.
Sa pagkakarun, giingong gisirad-an gayud ang naasoy nga dalan arun nga mapadayon ang pagtrabaho niini nga gibana-bana nga anaa sa 500 meters ang gitas-on.
Gipahibalo ni Alimpangog nga gilauman nga sa buwan sa Setyembre ning kasamtangan nga tuig mahuman ang maong proyekto.
