Gipasalig sa Department of Public Works and Highways (DPWH) nga ang mga bag-ong flood control projects nga ipatuman ubos sa ilang departamento nga ilang hugot nga bantayan ug siguruhon nga mosunod sa saktong proseso ug plano.
Sumala ni DPWH Sec. Vince Dizon, kon adunay bag-ong plano alang sa mga proyekto sa pagkontrol sa baha nga himuon pag-usab, iyang gipasalig nga kini bantayan ug buhaton sa saktong paagi, diin gipasiugda sa kalihim nga ang Iligan nalakip sa mga proyekto nga tukuran.
Hilabi na nunot sa nasinati og grabeng pagbaha ang probinsya sa Iligan atol sa Bagyong Basyang, diin nakatala kini og lima ka patay tungod sa paspas nga pagsaka sa tubig baha sa lugar.
Gawas niini, misaad usab si Dizon nga gamiton nga oportunidad alang sa hustong pagplano alang sa tuig 2027, diin ang pagtukod og mga proyekto ug istruktura nga gikinahanglan sa mga tawo magsugod na, labi na sa mga lugar nga dali mabahaan.
Samtang, basi sa pagmonitor sa iyang opisina, gawas sa Iligan, ang mga probinsya sa Cagayan de Oro, Cotabato ug Maguindanao nanginahanglan usab og mga proyekto sa pagkontrol sa baha, nga tanan adunay daghang napamatud-an nga mga lugar nga dali mabahaan.
Kahinumduman nga sa gisugyot nga 2026 budget nga gipirmahan ni Presidente Ferdinand Marcos Jr., adunay P2.49 bilyones ka pesos nga gigahin alang sa maintenance ug operating expenses sa kasamtangang flood control ug drainage systems.
