Nagdungan nga migawas sila si Senador Ronald “Bato” dela Rosa ug Senador Robinhood Padilla sa Senate compound human sa sunod-sunod nga mga pagbuto sa armas sa ikaduhang andana sa building niadtong Miyerkules sa gabii, Mayo 13.
Sumala ni Senate Sergeant-at-Arms Mao Aplasca, ang CCTV footage ug mga report sa seguridad sa Senado nagpakita nga ang duha ka senador naglakaw lang paingon sa sakyanan ni Padilla.
Dugang ni Aplasca nga daw wala gitago sa mga senador ang ilang pagbiya. Bisan pa, ang iyang opisina magpadayon sa pag-imbestiga kung nganong wala sila gisultihan o gipahunong sa mga gitahasan nga security personnel.
Sa usa ka press briefing, gibasa ni Senate President Alan Peter Cayetano ang inisyal nga taho diin gipahibalo siya sa Office of the Sergeant-at-Arms bahin sa pagbiya sa duha ka opisyal mga alas 2:30 sa kaadlawon.
Giklaro ni Cayetano nga ang mga opisyal sa Senado walay legal nga basehan aron mapugngan ang senador sa pagbiya sa lugar, bisan pa nga siya ubos sa protective custody.
Bisan pa niini, personal gihapon nga susihon sa Senate President ang impormasyon.
Samtang, gipaambit usab ni Cayetano nga nakigsulti siya sa asawa ni Dela Rosa. Nangayo siyag pasaylo sa kagubot nga nahitabo ug gipasabot nga mibiya ang senador tungod kay nahadlok siya nga mameligro ang kinabuhi sa iyang mga kauban ug empleyado kung magpabilin siya sa building.
Sumala sa asawa sa magbabalaod, posible nga gipahimuslan ni Dela Rosa ang kagubot ug pinusilay aron makagawas.
Sa pagkakaron, wala’y klarong impormasyon si Cayetano bahin sa nahimutangan ni Dela Rosa, apan padayon silang nag-ampo alang sa kaluwasan sa senador.
