CEBU – Kalipay nga adunay gamay nga kabalaka ang gibati karun sa pamilyang Lopez human nga nakita-an na ug ‘probable cause’ sa korte nga mapasakaan ug kaso ang bana sa biktimang si Angelie Lopez Kintanar nga si Harold Carillo Kintanar.
Gibutyag ni Analou Lopez, ang igsuon sa biktima, nga ilahang gikalipay ug gamay ang maong kalamboan diin giingong misugod na pagligid ang hustisya alang sa iyahang igsuon.
Apan matud pa, nagsugod pa lang kini ug sila nasayod nga taas pa ang ilahang latason ug wala pa’y nasayod sa dagan unya sa kaso. Subay niini, nagpasalamat si Lopez sa mga pulis nga mitabang kanila nga mapasaka ang kaso, ang Mandaue City Prosecutor’s Office, ingon man sa kahigalaan sa biktima nga misuporta gayud kanila.
Gihimug-atan niini nga dili gayud mo atras ang ilahang pamilya sa maong kaso gumikan kay kinabuhi sa iyahang igsuon ang nawagtang ug nilu-og ang gibuhat sa suspek sa maong krimen.
