Gipasalig ni President Ferdinand Marcos Jr. nga ang gobyerno magpadayon sa pag-focus sa panglawas, pagkaon, ug kaayohan sa mga Pilipino, ilabi na ang mga batan-on.
Sa iyang vlog, gipasabot ni Marcos kon giunsa niya pag-andam ang iyang ikalima nga State of the Nation Address (SONA).
Miingon siya nga siya mismo ang nagsulat sa una ug katapusang mga bahin sa pakigpulong, samtang nakigtambayayong siya sa usa ka team sa pagkomposo ug pag-research sa ubang mga bahin.
Sumala sa Presidente, migahin sila og pipila ka semana sa pagpangandam alang sa SONA ug nagpadayon siya sa pagpino sa iyang pakigpulong hangtod sa adlaw mismo nga miatubang siya sa Kongreso.
Gihisgutan usab niya ang mga sulat gikan sa mga batan-on nga nangayo og mas dako nga suporta alang sa panglawas ug batok sa kagutom, mga bisyo, ug uban pang mga problema.
Matud sa Presidente, nga ang mga programa sa gobyerno naglakip sa ‘Walang Gutom Program’, programa sa pagpakaon sa eskwelahan, suporta alang sa mga pasyente sa dialysis, ug uban pang mga serbisyo sa panglawas.
Gipasiugda usab niya ang zero balance billing sa mga ward sa ospital sa DOH ug uban pang tabang alang sa mga pasyente nga nanginahanglan og tambal ug pagtambal.
Sumala ni Marcos, importante alang sa mga Pilipino nga mahimong himsog ug adunay igong pagkaon aron adunay mas maayong kinabuhi ug kaugmaon.
