CENTRAL VISAYAS-Gipusil patay ang usa ka lalaki kagahapon Nobyembre 6, 2023 pasado alas 3 sa kaadlawon sa Purok 7, Brgy. Calangahan, Sagbayan, Bohol.
Giila ang biktima nga si Rolando Cenabre Siton Jr, 38-anyos, residente sa Brgy. Kagawasan, Sagbayan, Bohol.
Matud sa imbestigasyon sa kapulisan sa maong lungsod, mitambong og vigil sa Barangay Calangahan si Siton apan kalit kini gipusil sa wala pa mailhi nga suspetsado.
Samtang, narecover sa maong crime scene ang kalibre .45 nga armas ug ang biktima nakasustain og unom ka samad pinusilan diin lima niini kay sa iyahang agtang ug usa sa iyahang kamot, hinungdan sa iyahang hinanaling kamatayon.
Gibutyag ni Binangbang nga ang biktima adunay past records sa kapulisan diin nalambigit kaduha sa illegal nga drugas, una niadtong 2014 ug ika-duha niadtong 2020.
Ni-atubang kini og kaso nga kalapasan sa section 5 ug 11 sa RA 9165 o Comprehensive Dangerous Drugs Act of 2002.
Sa pagkakaron, gipalawoman sa kapulisan ang ilahang imbestigasyon aron ma-ilhan ang maong suspetsado.
Dugang pa nga ilahang gitan-aw ang tanan nga posibleng motibo sa pagpamusil lakip na ang kalambigitan niini sa ilegal nga drogas ug ang personal nga kasungian.
