Gipasakaan na sa mga awtoridad og mga kasong kriminal ang usa ka 15-anyos nga estudyante nga nalambigit sa makamatay nga pagpamusil sa San Jose National High School sa Tacloban City.
Tulo ka estudyante ang namatay ug 15 ang nasamdan sa insidente.
Usa ka 14-anyos nga estudyante ang anaa usab sa kustodiya sa mga awtoridad kalabot sa kaso. Diin ang duha gibutang ubos sa pag-atiman sa City Social Welfare and Development Office samtang nagpadayon ang imbestigasyon.
Atol sa imbestigasyon, migawas nga usa sa mga anggulo nga gitan-aw sa insidente mao ang posibleng bullying, apan mas gipalawman pa sa Police Regional Office ang imbestigasyon. Gumikan sumala sa PRO 8, wala nila gisalikway ang ubang posibleng motibo, ug padayon nga gitun-an ang tanan nga impormasyon nga ilang natapok.
Gibutyag usab sa imbestigasyon nga ang batan-ong suspek posibleng nagpabuto pa og dugang mga bala.
Samtang, usa ka babaye nga pulis nga iyaan sa usa sa mga suspek ang giimbestigahan usab human giingong gigamit ang iyang pusil sa insidente.
Sumala sa pulis, ang opisyal gibutang na sa restrictive custody ug gitangtang na sa iyang pwesto samtang nagpadayon ang administratibong imbestigasyon.
Plano usab sa mga awtoridad nga ilakip ang mga ginikanan sa mga suspek sa posibleng mga kaso.
Gipasalig sa PRO 8 nga duha lang ka menor de edad ang direktang nalambigit sa pagpamusil ug walay laing mga estudyante nga nalambigit sa pagpamusil.
