Gipasalig ni Presidente Ferdinand Marcos Jr., nga padayong iduso sa iyang administrasyon nga himuong world class ang pwersa sa AFP ug i-modernize ang mga kahimanan sa militar ug pauswagon ang training program aron andam ang mga sundalo sa bisan unsang hagit.
Gihimo ni Marcos ang maong pasalig atol sa Joint Graduation Ceremony sa Major Services Officer Candidate Course sa Armed Forces of the Philippines nga gipahigayon sa Camp Aguinaldo.
Sa iyang pakigpulong, ang Presidente miingon nga ang ilang gradwasyon simbolo sa ilang determinasyon, sakripisyo, ug kakugi aron mabuntog ang mga hagit sa pagka-AFP officer.
Iyang gidasig usab ang mga gradwado nga gamiton ang ilang nakat-onan isip giya sa ilang mga karera.
Dugang pa niini nga ang pagpangulo basi sa serbisyo, kabag-ohan, ug teknikal nga kahibalo mao ang labing epektibo nga hinagiban batok sa mga bag-ong hulga ug modernong mga panagbangi.
Ug magsugod kini sa pagpamuhunan sa mga kawani ug pagbansay sa mga bag-ong lider nga maghiusa sa tradisyon ug modernong pamaagi.
