Nanghinaut si Presidente Ferdinand Marcos Jr. nga wala na’y Pilipino nga gutomon hinungdan nga gihandum niini ang whole-of-nation approach aron matubag ang nasangpit nga problema.
Gihimo sa president ang iyang pamahayag atol sa “Walang Gutom Awards” alang sa mga local government units nga mihimo og talagsaong mga lakang aron matubag ang problema sa kagutom sa ilang mga komunidad.
Matod niya, ang gobyerno, pribadong sektor, non-profit nga organisasyon ug bisan ang internasyonal nga komunidad kinahanglan maghiusa sa pwersa aron matubag ang problema sa kagutom.
Ang Walang Gutom Award gipangulohan sa Department of Social Welfare and Development (DSWD) ug Galing Pook Foundation diin 17 ka LGUs ang gipasidunggan isip best performing Local Government Units (LGUs) sa pakigbatok sa kagutom ug malnutrisyon.
Gitumbok ni Marcos nga ang mga lakang nga gihimo sa mga LGUs usa ka dakong butang sa nasudnong kagamhanan nga nagtumong sa paghunong sa kagutom sa nasud ilabina sa mga huyang nga sektor.
Gipasalig sa Presidente nga buhaton sa gobyerno ang tanan nga pamaagi aron mabatukan ang kagutom sa nasud.
Kung mahinumdoman nga sa miaging tuig gipirmahan ni Presidente Marcos ang Executive Order No. 44 o ang Walang Gutom 2027: The Food Stamp Program isip usa sa mga flagship programs sa administrasyong Marcos Jr.
