CEBU CITY-
Gilauman nga mosalmot sila si Presidente Ferdinand Marcos Jr., Bise-Presidente Sara Duterte-Carpio, Senate President Francis “Chiz” Escudero, ug House Speaker Martin Romualdez gsa Opening Ceremonies sa Palarong Pambansa 2024 karong Hulyo 9, 2024 sa Cebu City Sports Center.
Gawas sa maong mga opisyal, motambong usab ang ubang mga senador sa republika, gobernador, mayor, ug uban pang mahinungdanong personalidad sa nasud arun abi-abihon ang mga atleta nga gikan sa 17 ka rehiyon sa tibuok nasod.
Kini maoy gipahibalo ni Cebu City Schools Division Assistant Superintendent Adolf Aguilar sa gipahigayong coordination meeting niadtong Hunyo 11, diin gipatawag ni Cebu City Acting Mayor Raymond Alvin Garcia.
Matud pa nga ang Bise-Presidente maoy unang moabot sa Sugbo karong Hulyo 8 sa iyang kapasidad isip education secretary.
Mao nga giawhag ni Aguilar nga hapsay ang dagan sa trapiko ug limpyohan ang mga guba nga karsada sa Osmeña Blvd. sa opening ceremony nga ipahigayon sa Cebu City Sports Center, alang usab sa seguridad ug kaluwasan sa parada sa mga atleta.
Una niini, gibutyag ni Dr. Salustiano Jimenez, ang regional director sa Department of Education Central Visayas nga malipayon kini sa tinguha sa Cebu City Government nga mahatag ang ‘best’ alang sa naasoy nga kalihokan.
Ingon man nga usa sa mga hinungdan nga nakuhaan kini og tunok o mga hagit sa umaabot nga palarong Pambansa mao ang gihunahuna nila kabahin sa Oval apan, malipayon kini nga gipaambit nga hapit na kini nga mahuman.
