Gipaniguro sa Philippine Coast Guard (PCG) ang padayon nga hugot nga pagbantay sa mga kalihokan sa mga barko sa China Coast Guard (CCG) sa kadagatan sa Zambales aron maseguro nga ang mga mananagat kay makapadayon sa pagpanagat ug makapadayon sa ilang panginabuhi.
Sa update nga gipaambit sa tigpamaba sa PCG sa West Philippine Sea Commodore Jay Tarriela nga ang barko sa PCG nga BRP Teresa Magbanua nagpabilin nga gipakatap duol sa Chinese Coast Guard vessel 3304 nga ilegal nga naglawig sa gibanabanang 70-80 nautical miles sa baybayon sa Zambales.
Matod niya ang dili matarug nga presensya sa barko sa PH gibase sa standing policy direction ni Presidente Ferdinand Marcos Jr. nga nagtumong sa pagpugong sa pag-normalize ug pag-legalize sa mga ilegal action sa CCG nga mahimong mosangpot sa pagpahayag niini sa pagkontrolar sa nahisgutang kadagatan.
Kalabot niini, ang padayong pagpaniid sa BRP Teresa Magbanua sa nahisgutang kadagatan nagsilbi nga proactive nga lakang aron masiguro nga ang mga mangingisda nga Pilipino makahimo sa ilang mga kalihokan nga walay hulga sa pagpanghasi o pagpanghulga.
Ingon man ang pagbutang sa BRP Teresa usa ka pagpakita sa pasalig sa pagmonitor ug pagmentinar sa presensya niini aron mapugngan ang mga ilegal nga kalihokan sa CCG samtang nagsunod sa mga prinsipyo sa pagpugong ug dili paghagit.
