Gi-deploy sa Philippine Coast Guard (PCG) ang duha ka barko ug usa ka aircraft sa Rozul reef sa West Philippine Sea (WPS).
Kini agi’g tubag sa gikataho nga ilegal nga panagtapok sa mga barko sa Chinese Maritime Militia (CMM) sa lugar.
Sa pag-abot sa PCG assets sa reef, nakumpirmar ang presensya sa kapin 50 ka CMM vessels nga nagkatag.
Ang mga barko ug eroplano sa PCG diha-diha dayon nag-isyu og mga radio challenge ngadto sa mga barko sa CMM aron sa pagpahibalo kanila nga sila naglihok sulod sa exclusive economic zone (EEZ) sa Pilipinas nga gibana-bana nga 130 nautical miles gikan sa baybayon sa Palawan.
Gipasiugda sa PCG ang dili regular nga mga sumbanan sa paglihok sa milisya sa China sa ilang pag-angkla ug pagpundok nga mga kalihokan sa lugar, nga naglapas sa mga prinsipyo sa kagawasan sa paglawig ug mga katungod sa soberanya sa Pilipinas sa kaugalingon nga EEZ.
Gimandoan usab ang mga barko sa CMM sa pagklaro sa ilang tuyo ug pagpadayon subay sa Philippine Maritime Zones Act, UN Convention in the Law of the Sea (UNCLOS) ug 2016 Arbitral Award.
Hinuon, bisan pa niini, ang habig sa PH wala makadawat og tubag gikan sa mga barko sa CMM.
Aron sa hustong pagdokumento sa sitwasyon, ang PCG mipakatap sa ilang mga rigid hull inflatable boats aron moduol sa CMM vessels sa mabaw nga kadagatan sa Rozul Reef ug gitaho ang ilang mga bow number.
Sa usa ka pahayag, ang tigpamaba sa PCG for WPS Commodore Jay Tarriela miingon nga ang PCG nagpabilin nga pasalig sa pagpanalipod sa maritime jurisdiction sa nasud sa West Philippine Sea.
Matod pa niya nga padayon ang ilang pagmonitor ug pagtubag sa bisan unsang dili awtorisado nga kalihokan sulod sa EEZ base sa palisiya ni Presidente Ferdinand Marcos Jr.
