Natalang nagmalinawon ang nahitabong Penitencial Walk with Jesus sa dalan Osmeña Blvd. padulong sa Basilica Minore del Sto. Niño de Cebu ning dakbayan sa Sugbo kaganihang sayong buntag rong adlaw sa Huwebes, Enero 8, 2026.
Kabahin kini sa mga religious activities sa ika-461 nga katuigan sa pagsaulog sa Fiesta Señor sa Sr. Sto. Niño de Cebu.
Sumala pa sa eksklusibong pakighinabi sa Bombo Radyo Cebu News Team kang Cebu Ciity Councilor Dave Tumulak, kinsa kabahin sa Sinulog Committee sa dakbayan ug Chairman sa City Committee on Disaster Risk Reduction and Management Council nga mikabat sa kapin 240,000 ka mga deboto ang misalmot base sa ilang bana-bana.
Gani mipadayag sa iyang pasalamat si Tumulak sa tanang hingtundang ahensya sa pagpakatap og mga personahe nga miabag sa seguridad ug kahapsay sama sa mga sakop sa kapulisan, kasundalohan, kabumberohan, medical emergency teams, disaster personnel ug uban pa ingon man sa mga deboto sab sa disiplinang gipatigbabaw sa kalihukan.
Apan bisan sa pagkamalinawn sa kalihukan, ang mga awtoridad nakatala og usa ka kaso sa kasamok o public disturbance gikan sa usa ka babayeng namatyagang hubog nga nangluwa sa kadalanan sa Osmeña Blvd. apan daling narespondihan sa mga tigpatuman sa balaod aron mahipos kini sa daw gihulagway nga posibleng adunay problema sa pangisip kay misaysay kini nga adunay dakong tawo naggukod niya.
Samtang sa habig sa mga narespondehan sa kakulian sa panglawas, nakatala lang ang mga awtoridad og 8 ka mga indibidwal nga nakasinati og paglain sa lawas diin minor cases lang kini og dili hulga sa kinabuhi.
Gilauman sa opisyal nga sa mga musunod nga kalihukan kabahin gihapon sa kapistahan kay magpadayon ang kalinaw ug kahapsay para sa mga deboto ug mga turista.
