Gisang-at ni health reform advocate Dr. Tony Leachon ang petition for certiorari and prohibition sa Korte Suprema nga nagkuwestiyon sa legalidad sa zero subsidy o non-allocation of subsidy sa Philippine Health Insurance Corporation (PhilHealth) ubos sa 2025 national budget.
Ang mga nitubag sa petisyon naglakip nila ni House Speaker Martin Romualdez, Senate President Francis “Chiz” Escudero ug Executive Secretary Lucas Bersamin.
Sa petisyon ni Dr. Leachon, gihangyo niya ang Korte nga mag-isyu og temporary restraining order o writ of preliminary injunction aron mapahunong ang pagpatuman sa 2025 General Appropriations Act (GAA) bahin sa zero subsidy alang sa mga state insurer.
Gihangyo usab ni Dr. Leachon ang Korte sa pag-isyu og writ of mandamus nga magmando sa mga hingtungdang ahensya sa gobyerno sa paggahin dayon og pag-release sa gikinahanglang pundo sa PhilHealth subay sa Universal Health Care Act ug sa 1987 Constitution.
Gipasabot ni Dr. Leachon nga iyang gisang-at ang petisyon tungod kay ang non-allocation of subsidies sa PhilHealth kay unconstitutional, nga maoy unang higayon sa kasaysayan sa nasud nga ang Presidente sa Pilipinas, ingon man ang Senate President ug ang Ubos Balay Balauranan, wala maghatag og bili sa panglawas sa mga Pilipino.
Matud pa ni Leachon nga ang realignment ug pagpataas sa pundo alang sa ubang sektor, partikular na sa Kamara ug Senado, gihimo sa dili makatarunganong paagi nga naghikaw sa mga Pilipino sa ilang katungod sa transparent nga proseso sa pagpondo.
Hinuon, matod niya, ang mga respondents mipakamatarong sa pagpahigawas sa Philhealth sa pundo pinaagi sa pagkutlo sa gibanabanang P600 bilyones nga reserbang pundo.
Ang pagpasaka sa petisyon nag-abot taliwala sa pagpadayon sa SC sa oral arguments sa mga kaso nga naghagit sa pagbalhin sa pundo gikan sa PhilHealth ngadto sa nasudnong panudlanan.
