Nigahin ang Philippine Ports Authority (PPA) og P16 bilyones alang sa pagpalapad ug sa modernisasyon sa mga dagkong proyekto sa pantalan sa nasod sa mosunod nga upat ka tuig.
Matud ni PPA general manager Jay Santiago, nga dako nga bahin sa nasangpit nga pundo ang gi-alokar alang sa pagpatuman sa 14 ka big-ticket port projects sa ahensya.
Lima niini anaa sa Luzon, unom sa Visayas, ug tulo sa Mindanao.
Gipasabot sa tagdumala sa mga pantalan sa nasod nga P3.5 bilyones gikan sa tinuig nga P4 bilyones nga pundo ang gigahin alang sa maong mga proyekto matag tuig.
Samtang, ang mga proyekto naglakip sa Port Capinpin, Currimao Port, Jose Panganiban Port, Bologo Port ug Claveria Port sa Luzon.
Sa Visayas, naglakip kini sa Catacbacan Port, Tapal Port, Babatngon Port, Banago Port, ug Ormoc Port, uban sa pagtukod og bag-ong pantalan sa Northern Samar.
Alang sa Mindanao, apil na niini ang pagtukod og bag-ong pantalan sa Dapa, Surigao del Norte alang sa mga cargo ship, pag-upgrade sa Port of Sasa; ug pagpalapad sa pantalan sa Misamis Occidental.
